მტკნარი სიცრუეა ინფორმაცია, თითქოს საქართველოს 95 მილიონიანი დაფინანსება შეუწყდა, საუბარი შეიძლება იყოს მაქსიმუმ 2 მილიონი ლარის ირგვლივ, – ამის შესახებ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა მიხეილ სარჯველაძემ დღეს გამართულ პრესკონფერენციაზე განაცხადა.
მისივე თქმით, 95 მილიონზე და ასეთ ასტრონომიულ რიცხვებზე საუბარი არ არის ლუგარის ლაბორატორიასა და დაავადებათა კონტროლის ეროვნული ცენტრთთან მიმართებით.
ჯანდაცვის მინისტრის განმარტებით, დაგეგმვის შემდეგ შესაძლოა მხარეები ჩამოყალიბდნენ ახალ ფორმატებზე, მაგრამ ადამიანების შეცდომაში შეყვანაა საუბარი იმაზე, თითქოს საქართველოს მხარეს 95 მილიონიანი დაფინანსება შეუწყდა.
„ეს, რასაკვირველია, აბსოლუტურად მტკნარი სიცრუეა, როგორი სიცრუეც ბევრი გავრცელდა ამ დღეებში ამ საკითხთან დაკავშირებით. რაც შეეხება თითქოსდა კავშირს რომელიმე მიღებული საკანონმდებლო აქტისა ახლა მიღებულ გადაწყვეტილებასთან, მე ვფიქრობ, რომ ასეთი კავშირი ობიექტურად არ არსებობს.
კარგად უნდა გვესმოდეს, რომ ჯანდაცვის სისტემის მდგრადობის განვითარება და ამ თვალსაზრისით კვლევითი თანამშრომლობა ჩვენს პარტნიორ სახელმწიფოებს შორის არის საკმაოდ დიდი მნიშვნელობის. ეს კარგი პროექტებია და ვფიქრობ, გაცილებით მაღლა დგას თავისი ჰუმანიტარული და იდეალური მიზნებიდან გამომდინარე, ვიდრე ნებისმიერი პოლიტიკური პროცესი ამ ქვეყანაში“, – აღნიშნა მიხეილ სარჯველაძემ.
„მინდა სრული პასუხისმგებლობით განვაცხადო და ვამცნო საზოგადოებას, რომ არავითარი საუბარი ლუგარის ლაბორატორიისა და დაავადებათა კონტროლის ეროვნული ცენტრის საქმიანობის შეჩერებაზე ან მის დახურვაზე არ არის“,-განაცხადა ჯანდაცვის მინისტრმა მიხეილ სარჯველაძემ.
მინისტრის თქმით, ზოგიერთი მედიასაშუალების მხრიდან ვრცელდება არასწორი ინფორმაცია, თითქოს აშშ-ის მიერ შეჩერებული დახმარების გამო, ლუგარის ლაბორატორია და დაავადებათა კონტროლის ეროვნული ცენტრი წყვეტს მუშაობას, რაც სიმართლეს არ შეესაბამება.
„ლუგარის ლაბორატორიაც და დაავადებათა კონტროლის ეროვნული ცენტრიც, შეუფერხებლად განაგრძობს მუშაობას“,-აღნიშნა მიხეილ სარჯველაძემ.
მან მოუწოდა ოპონენტებს, ნუ გამოიყენებენ გარკვეულ საკითხებს, ვიწრო პოლიტიკური ინტერესებისთვის და ნუ შეიყვანენ შეცდომაში საზოგადოებას.
„საუბარია რამდენიმე მიმდინარე პროექტის შეჩერებაზე, რომლის შინაარსიც გახლავთ კვლევითი საქმიანობა, ტრენინგები და ა.შ. ეს არ გახლავთ არც ერთი ისეთი პროგრამა, რომელზეც დამოკიდებულია, ჯანდაცვის რომელიმე პროგრამის განხორციელება“,-განაცხადა მინისტრმა.
მიხეილ სარჯველაძის თქმით, სამინისტრო გააკეთებს ყველაფერს იმისთვის, რომ შეფერხება არც ერთ პროექტს არ ჰქონდეს.
ბოლო დროს გავრცელებული ინფორმაციის თანახმად, არ არსებობს კონკრეტული ინფორმაცია ან ოფიციალური განცხადება ლუგარის ლაბორატორიისა და დაავადებათა კონტროლის ეროვნული ცენტრის საქმიანობის შეჩერებას ან დახურვასთან დაკავშირებით. ამ ეტაპზე, ორივე ორგანიზაციის მუშაობა უწყვეტად მიმდინარეობს და მათ მიერ გაწვდილი სერვისები და მომსახურებები კვლავ ხელმისაწვდავია საზოგადოებისთვის.
